“Mongolia mining 2018”-олон улсын уул уурхайн үзэсгэлэн найм дахь удаа болох гэж байна. Үзэсгэлэн энэ лхагва гарагт Буянт-Ухаа спорт цогцолборт эхэлж, гурван өдөр үргэлжилнэ. Энэ жилийн үзэсгэлэнд 20 орны 130 орчим компани, түүний дотор Монгол Улсад үйл ажиллагаа явуулдаг дотоод, гадаадын хөрөнгө оруулалттай компаниуд мөн Канад, Чех, Австрали, АНУ, Герман, ОХУ, Япон, БНХАУ, Беларусь, БНСУ, Энэтхэг, Казахстан, Украин, Турк Шведийн ханган нийлүүлэгчид оролцоно. Тэд техник, технологи үйлчилгээгээ танилцуулж байна.
Трансвест Монголиа, Вагнер Ази тоног төхөөрөмж, АОДЭ, Юнайтэд белаз машинэри, CTMS, Hera equipment, Грийн химистри, Мицубиши материалp корп, Эпирок Монголиа, Professional зэрэг уул уурхайн томоохон техник, тоног төхөөрөмж нийлүүлэгчид шинэ техникүүдээ дэлгэн харуулна. Мөн Канадын арван ханган нийлүүлэгч анх удаа оролцож байгаагаараа онцлог.
Үзэсгэлэнгийн үеэр Ашигт малтмал, газрын тосны газраас Монголын уул уурхайн салбарын өнөөгийн байдал, бодлогын семинар явуулдаг. Өнгөрсөн онд нүүрсний салбарыг тойрсон илтгэл хэлэлцүүлсэн бол энэ удаад өнгөт металлын салбарыг онцлох аж.
Энэ жилийн хэлэлцүүлэгт “Оюутолгой”, “Эрдэнэс Монгол”, “ЭТТ”, “Эрдэнэт” үйлдвэрийн төлөөлөл худалдан авалтын журам, шаардлагаа ханган нийлүүлэгчид танилцуулна.
Одоогоор энэ үзэсгэлэнг үзэхээр 2000 орчим хүн бүртгүүлжээ. Өнгөрсөн онд 4000 орчим хүн Буянт-Ухаад ирж, үзэсгэлэн үзэж сонирхсон байна. Харин оролцогч компанийн тоо 120-иос 130 болж өсжээ. Буянт-Ухаа спорт цогцолборын талбайд тааруулан, дээд тал нь 130 компани л талбай түрээслэх боломжтой юм байна. Ийм зохион байгуулагчид энэ хязгаарын дагуу эхний 130 ханган нийлүүлэгчийг бүртгэжээ. Компаниудын тоо гүйцсэнээс бүртгэл хоёр сарын өмнө дууссан байна. Иймд олон улсын түвшинд үзэсгэлэн гаргах, зориулалтын объект цаашид барих шаардлагатайг Т.Баттулга захирал онцлов.
Хэдий бүртгүүлээгүй ч үзэсгэлэн үзэх бол иргэд үзэсгэлэнгийн гол хаалганы өмнө бүртгүүлээд үзэх боломжтой. Мөн иргэдэд зориулан Баянгол, Шангри Ла зочид буудлуудаас цагийн хуваарийн дагуу автобусаар үйлчилнэ.
Найм дахь удаагийн үзэсгэлэнг уламжлал ёсоор Уул уурхай хүнд үйлдвэрийн яам, Ашигт малтмал, газрын тосны газар, МҮХАҮТ, Оюутолгой компаниуд дэмжин ажиллажээ. Үзэсгэлэнг “Майнэкс Монгол”, “Эрдэнэс Монгол” хамтран зохион байгуулж байна.
